Luke 3

Yoniu ai nagami folo epolose bo ai kaga lu yege ho'ehina

Mt 3:1-12; Mk 1:1-8; Yn 1:19-28

1Sipi Lomu bo Taibiliasi 15 kufu'a kana kaba hu'ehinalo gamani bo Ponitiasi Pailati, ai Yutia melugu bona'magihi kohe toto kaba huto mino'ehina. To ya'mana kanalo Heloti ai kohe toto Galili kegi'a sipi kaba bo mino'ehina. To go'afu Filipi ai Itulia to Telekonaitisi kegi'a yata'a kaba bo mino'ehina. To gamani bo Laiseniasi ai Abilini kegi'a kaba huto mino'ehina. 2To Anasiugo Kaiyafasiugo etali sipi mono nohi kabalo bole mine'aha'ina. To ya'mana kanalo Sekalaiyahi pana'a Yoni ai ka melugu nohigo Hu'mamofihi ka'a aitoga lu huto hu'ehina. 3Ya higo ai Yotani nagami'mo kegi'a Hu'mamofihi kaga'a leli'ali huto boana'i nehanalo lu yege ho epi'ehina: Komopatini i gelehe hite foipanatinigati li he'mite nagami felelenogo Hu'mau foipanatini li he'mi lepalalibe, luto mino'ehina yabe. 4Ai ya higo ana legitana lu huto huto bo mone Aisaiyau ka'a bukugu go'ehina suhi huto ma ni'ibe:

• Ka melugu bo moneuba nogo moloto
• kehe sipi noibe:
• Sipi Bomofihi kapo'a le'mo lele hi etete
• to kapo'a le'mo fu lite
• li kosaba hi etalo.

5

To ya lenali

asaga kemuya li hekini lo su hete

moneko legege hu etalo.

Ana hite

kosa sipi'afi bohupo'afi li gofa hinogo

limo i su halo.

To asaga kapo kiyugu hu'ehina,

le'mo bebe salo.

To asaga kapo efahubago hu'ehina,

le'mo bati hilo.

6

To asaga bona'i

Hu'mau ai aku'i lele'mose lilina'a

bu galana'mu yabe.

7To babu boana'i enali nagami falalune'mu Yonitoga elago ai ma luto ana boana'i lu epi'ehina: Lenali laga mehina osifa'mofihi yagapana'i yabe. Kuyu'afu lu lepina'a hite Hu'mamofihi ipakafa hilinamomu'i koli hite he'mite alihi huto hilinanalo be ligite bilune'mu nehabe? 8To lenali foipanatiniguti i gelehe hilanana'muko kehelite minalo. Ya hilenogo nelepilata bu galube. Lenalitiniguti ka mone lu ho tite Abalaha tatatifu yabe lite melilo. Lenali lenegekesa kehelite Abalahau kaba hu letalibe lite ya melilo. To nani lu nolepube. Hu'mau ma efahi lito Abalahahi tata'afi lolo hilibe. 9To sopolo'i huto'i ni'inagi yafa lufusa'a laga huse'na ni'ibe. Ya hu'ehinago asaga yafa legeya'a mehalina hetigito logoguko falalina'mu yabe.

10To ai ya luto lu epilago boana'magi loka he'ahana: Lali hena hilune? 11To Yoniu ai ka'anilo lu'ehina: Bo moneuba gukete loemo li'ohutomo mone kalalukafihi meni'ilinamofihi emibo. To bo mone maka nose'na ni'ilina maka nose'na'a meni'ilina bo hiti guna ite naliyo. 12To takisi lise bo mone'a hiti enali ana hite nagami'i falalune'mu e'ahanati enali Yonihi loka he'ahana: Tisao, lali hena hilune? 13To Yoniu ai lu epi'ehina: Lenali moni efahi gamaniuba lu'ehilina legege aloko lilo to mone li be ligite melilo. 14To gimi bo mone'amagi ana hite loka he'ahana: Lalimoya, lali ana huto hena hilune? To Yoniu lu epi'ehina: Lenali faga lite ai go'na binogo ai go'na binogo hite fato fato bona'i enehete faga lite ka foyagu enele'me melete efaha'ani meli epalalo. To lenali efahatini loko lilo.

15Asaga boana'magi komopa'anigu keheli baga ite Yoni kumu ma lite keheli'ahana: Hu'mau le'mo ho ti'ehina bo, ya Mesia ai'imomu'i nohifi lite enekesa yigi babu lite'ani keheli'ahana. 16Ya higo Yoniu kehelito ma luto lu epi'ehina: Nani fa'mene nagamitu'i nofolo lepolobe. To alihi bo mone alina ai amuya'auba nani'i nebe ligito amuya'ni hoto alina'mu yabe. To naniya bati huto gigusa su'amofihi naga li he'miluna'a huto meni'ibe. To ai Hetofa Sikalafu'i lepilina'a hiti to logo'a suhi huto mone hiti folo lepalalina'mu yabe. 17To ai emuha'a yanuga li'ehibe. To kifi foya'aguti lilina yabe. To ai nose'na yufagaha'a li nomalana nonugu li nupa huto li malalina'mu yabe. To ya nohuto sibina'a li nupa huto mesobose loba logogu galina'mu yabe.

18To Yoniu asaga'i fato fato kaga boana'i enekesa li hokolo huse kaga lu noepito Hu'mamofihi ka'a lamana'a lu yege hoto epi'ehina yabe. 19To ya hu'ehina Yoni Helotihi yata'a gamani bo'aniuba babu foipa faipana huto to Helotiu go'afihi liha'a lito gi'a Helotiasi aitoga hu'ehinana'mu Yoniu ya'mana'mu ka emeki'ehina yabe. 20To ya higo asaga ka Helotitoga Yoniu lina kaga molo emito italuga logo bigo mone hiti ti'ehina foipana'alo naga'i emi'ehibe.

Kohe to'ehina kanagu Yoniu Yesuhi nagami folo eto'ehina

Mt 3:13-17; Mk 1:9-11

21Asaga boana'i nagami felete nehago to Yesu ana huto nagami fololoto nohuto nunumu nohigo kokuluma'i hokolo hu'ehina. 22Ya nohigo Sikalafu'i kigopa nama legitana huto aitoga nolimigo bu negago kokulumaluguti nogo moneuba ma luto lu'ehina: Kai nani pana'ni yabe. Kai nibita huse pana'ni nohane. Komopa'ni kaitogago nokumube.

Yesuhi tata'amagihi enigi'ani yabe

Mt1:1-17

23Yesu lili'na hapi fi'ehina kanagu foya kana'a 30 bulago hapi fi'ehina. Enali Yosefehi pana'a yabe lite enegekesa keheli'ahana. To Yosefe ai Hilai pana'a. Hilai ai pana'a Matati yabe. 24To Matati ai Libaihi pana'a yabe. To Libai ai Melekaihi pana'a yabe. To Melekai ai Yanaihi pana'a yabe. To Yanai ai Yosefehi pana'a yabe. 25To Yosefe ai Matatiasihi pana'a yabe. To Matatiasi ai Emosihi pana'a yabe. To Emosi ai Nehamihi pana'a yabe. To Nehami ai Esilihi pana'a yabe. To Esili ai Nagaihi pana'a yabe. 26To Nagai ai Meatihi pana'a yabe. To Meati ai Matatiasihi pana'a yabe. To Matatiasi ai Semenihi pana'a yabe. To Semeni ai Yosekihi pana'a yabe. To Yoseki ai Yotahi pana'a yabe. 27To Yota ai Yoananahi pana'a yabe. To Yoanana ai Lesahi pana'a yabe. To Lesa ai Selababelihi pana'a yabe. To Selababeli ai Sialitielihi pana'a yabe. To Sialitieli ai Nelaihi pana'a yabe. 28To Nelai ai Melekaihi pana'a yabe. To Melekai ai Etaihi pana'a yabe. To Etai ai Kosamehi pana'a yabe. To Kosame ai Elemetamehi pana'a yabe. To Elemetame ai Elehi pana'a yabe. 29To Ele ai Yosuahi pana'a yabe. To Yosua ai Eliesahi pana'a yabe. To Eliesa ai Yolimihi pana'a yabe. To Yolimi ai Matatihi pana'a yabe. To Matati ai Libaihi pana'a yabe. 30To Libai ai Simionihi pana'a yabe. To Simioni ai Yutahi pana'a yabe. To Yuta ai Yosefehi pana'a yabe. To Yosefe ai Yonamehi pana'a yabe. To Yoname ai Elaiyakimihi pana'a yabe. 31To Elaiyakimi ai Meliahi pana'a yabe. To Melia ai Menahi pana'a yabe. To Mena ai Matatahi pana'a yabe. To Matata ai Netanihi pana'a yabe. Netani ai Tebitihi pana'a yabe. To Tebiti ai Yesihi pana'a yabe. 32To Yesi ai Obetihi pana'a yabe. To Obeti ai Boasahi pana'a yabe. To Boasa ai Salamohi pana'a yabe. To Salamo ai Nasonihi pana'a yabe. 33To Nasoni ai Aminatapehi pana'a yabe. To Aminatape ai Atiminihi pana'a yabe. To Atimini ai Anaihi pana'a yabe. To Anai ai Hesolonihi pana'a yabe. To Hesoloni ai Pelesihi pana'a yabe. To Pelesi ai Yutahi pana'a yabe. 34To Yuta ai Yakopuhi pana'a yabe. To Yakopu ai Isakahi pana'a yabe. To Isaka ai Abalahahi pana'a yabe. To Abalaha ai Telahi pana'a yabe. To Tela ai Nehohi pana'a yabe. 35To Neho ai Selagahi pana'a yabe. To Selaga ai Liyuhi pana'a yabe. To Liyu ai Pelekehi pana'a yabe. To Peleke ai Ibahi pana'a yabe. To Iba ai Silahi pana'a yabe. To Sila ai Kenihi pana'a yabe. 36To Keni ai Afakasatihi pana'a yabe. To Afakasati ai Semihi pana'a yabe. To Semi ai Noahi pana'a yabe. To Noa ai Lemekihi pana'a yabe. 37To Lemeki ai Metusalahi pana'a yabe. To Metusala ai Inokihi pana'a yabe. To Inoki ai Yeletihi pana'a yabe. To Yeleti ai Mahalalihi pana'a yabe. To Mahalali ai Kenanihi pana'a yabe. To Kenani ai Inosihi pana'a yabe. 38To Inosi ai Setihi pana'a yabe. To Seti ai Ataha pana'a yabe. To Atau ai Hu'mamofihi pana'a yabe.